Na dat Begröten vun Scheersbarg-Direkter Karsten Biermann un Gesa Retzlaff vun dat Plattdüütsch-Zentrum ut Leck, de mit Moderator Jann Rothberg tosamen den Dag organiseert harrn, geev dat Gröten ut de Staatskanzlie. De hett Johannes Callsen, he is vun unsen Ministerpräsidenten de Beopdragte för Regional- un Minnerheitenspraken, vörbröcht. Un denn kreeg Jann dat Raat un sorgte mit gewohnte Gespöör un Plie för dat Inholen vun den Tietplaan un den Uttuusch vun Fragen un Rüchmellen mang de Gruppen un dat Publikum, dat opfordert worr „Magic Moments“ to beschrieven, Momente, de se bi’t Tokieken besunners faatnahmen harrn. Düt Snacken achteran um dat, wat dor to sehn weer, is vun Anfang an en Grundprinzip un Anlingen vun düsse Veranstalten un jemehr Kooperatschoonspartners (IBJ Scheersbarg, Zentrum för Nedderdüütsch Leck, Kulturstiftung Sleswig-Flensborg, Sleswig-Holsteensche Heimatbund, Nedderdüütsche Bühnenbund SH, Lannesverband vun de Amateurtheaters un LAG Speel) ween. Op de lichttechnisch prima utstatte Bühn vun den Festsaal to spelen, weer för all wat besünners. To ‘n Anfang kregen de Besökers to sehn, wat bi de Kinner-Theaterwarksteed op Platt rutkamen weer. Düt Anbott geev dat een Wuchenenn vörher op den Scheersbarg to dat Stück „Papageno, de lütte verzauberte Fleut un de böse Mono“ ünner dat Leid vun Heide Bachmann. Jemehr Bühnenutstattung worr vun de Grundschölers ut Stadum glattweg övernahmen, de dorna „Dat Märken vun den dicken fetten Pannekoken“ wiesten. De plaante Programmbidrag vun de Niebüller Gemeenschopschölers musste leider utfallen. Ne, dat harr noch gor nix mit de Virus-Krise to kriegen. Se kunnen den Weg na den Scheersbarg nich maken, wiel de Busfohrers in de Kreise Nordfreesland un Sleswig-Flensborg streikt hebbt. Also: Umbu bi apen Vörhang – niege Grundprinzip vunjohr, dat man op dat Rebeet Bühnenutstattung ok besunners licht Ideen afkieken kunn, un denn geev dat vun de Junge Lüüd ut Löwenstedt dat Stück „De Rööv“ to sehn, dat op moderne Oort mit Motive ut de Geschicht vun den Fischer un sien Fru denken leet. De teihn swarten Sitzwörpel, de bi düsse ganz reduzeert utstattete Inszenerung bruukt worrn, worrn promt vun twee anner Gruppen för jemehr Vörstellung later utlehnt – man süht wat un helpt sik, en besunners schöne un sülvstverständliche Saak bi düt Drapen. In de Middagspaus geev dat för de jungen Lüüd Gelegenheit bi en plattdüütsche Quiz mittomaken un en Gootschien vun den Scheersbarg to winnen, de för en Kurswuchenenn inlööst warrn kann. Vör dat mit de lütten Theaterspelers ut Hastedt wiedergung, bestellte Inge Büll-Meynerts vun den Lannesamateurtheaterverband ehr Gröten. De dithmarscher Grupp weer dat eerste Mal bi düt Drapen dorbi un sorgte mit „Sketche ut ‘t Leven“ för veel Vergnögen. Se kregen foorts en Kontaktanfraag vun en anner Grupp, de sik för de Texte interesseren de. Besunners geern sehn sünd bi düt Veranstaltungformat Produkschonen, de noch in de Maak sünd. Mit Utsnitten ut jemehr Proven harrn sik de Dörpergemeenschopsschool ut Zarpen un de Junge Lüüd vun de Schleswiger Speeldeel anmellt. To „Dat Geisterhuus“, wat de Schölers vun de plattdüütsche Modellschool ut de Neegde vun Lübeck wiest hebbt, weer sogor de Autor anreist. Mit Utsnitten vun jemehr Proven to „De wilden Höhner geven Vossalarm“ stellte sik de Jugendbühne ut Sleswig dat eerste Mal op den Scheersbarg vör. Speelleiter Rune Hansen lotste de Tokiekers mit korte Verkloren to dat plaante Bühnenbild un de utsöchten Speelszenen dör de bekannte Geschicht un maakte neeschierig op mehr. „Dat mutt ik mi unbedingt ankieken, wenn dat fardig is“ nehm sik männicheen Besöker vör. Fardig weer „De Zauberlehrling“ vun de Plietschen Platten Nordangler, de man kort vörher mit düt Stück Premiere harrn. Dor geev dat Rap-Elemente un lebennige Requisiten to entdecken. Dat dor ok twee erfohren wussen Lüüd mitspeelt hebbt, weer egens an den Anfang vun de Proventiet ut de Noot geborn, hörte man in’t Nagespräch vun de Grupp. En Konstellation, de sik för Speel un Spraak aver as Gewinn wiest harr. Mit „Acht för de perfekte Geschicht“ geev dat Jugendtheater vun de Nedderdüütsche Bühn Preetz as „Scheersbarg-Newcomer“ en Egenprodukschoon. De acht jungen Lüüd ut de Grupp hebbt dat Söken na düsse Geschicht in en Laborexperiment verpackt. Se experimenteren mit Motiven un Musiken ut Filmgeschichten, de se begeistern. Kann de Essenz ut all düsse Geschichten nich blots „perfekt“ sien? Enige Tokiekers, de sik in de moderne Film- un Medienwelt nich tummeln, harrn dat suer, den Faden optonehmen un de Pointen to verstahn. Annern beschreven de Vörstellung as „Gesamt-Magic-Moment“. De Instieg vun de Preetzer harr noch gor nix mit jemehr Stück, dorför besunners veel mit de Spraak to kriegen. Se verkünndten ehr egen Motive op de Fraag: „Warum plattdeutsches Theater?“ Ok düsse Antworten hebben Indruck maakt! An ’t Enn vun ’t Programm weer de een or anner vun düssen rieken Dag eenfach „platt“. De grote Bedeligung maakt Moot! Wenn de Nafraag so blifft oder noch wieder wassen deit wagen de Veranstalters ok över en Utbuen vun dat Drapen op twee Daag natodenken. Gruppen, de Interesse hebbt dat nächste Mal dorbi to ween, könen sik al vörmarken laten.