He hett nich blots dat Leid vun de Zentralschool Harrislee (ZSH), an de Günter Herrmann sik siet 2014 as Plattpate inbringt, de beiden sünd ok al lange Johren Bühnenkollegen bi de Nedderdüütsche Bühn (NDB) in Flensborg, de as Kooperatschoonspartner de friewillige Plattdüütschünnerricht an de ZSH ünnerstütt. Vörrangig dat Warken mit de Schölers un wat sietdem allens an Leder un Material ut Günter sien Kopp de Weg na "sien Kinner" funnen hett, ehrt düsse Pries. 

 

Över dörtig Kinnerleder un twee Musicals hett Günter Herrmann textet un komponeert, de eerste Hälfte is al fastholen in dat Heft "Leder för lütte Lüüd", wat 2019 mit Stütt vun de Fördervereen vun dat Plattdüütsch-Zentrum rutgeven worrn un kostenlos to kriegen is- De twete Band is al meist kloor un warrt 2022 sien Weg na de Lüüd finnen, de mit Kinner op Plattdüütsch wat maken wöllt. "Mit Musik geiht allens beter" is een vun Günter Herrmann sien Erkenntnisse, sietdem för em kort na dat sien Rohstand anfungen weer düsse Döör na de  Kinner opgung. Tweemal de Wuch sett he sik sien Gitarr op de Rüch un sien Hoot op de Kopp un löppt to School. 

 

Dat he ok in de dree Theaterstücken för de Klassenruum, mit dat de NDB al welke Johren na de Scholen -halv op Platt- un halv op Hoochdüütsch- quer dör de Region tourt de plattdüütsche Part övernahmen hett, kregen de Gäst jüst so to weten, as dat Günter in de Lockdown dat Lengen vun un na de Kinnen mit Videobotten un later Livekonferenzen överbrückt hett. 

 

"Frünnen sünd Frünnen...", de Refrain vun dat Afslussleed ut dat Musical "Vagel Gottlieb" sungen sien Schölers denn ok passlich in dat Videobott to de Veranstalten, wat jemehr Lehrerin Dörte Magnussen mit se opnahmen harr, Ok de Minnerheitenbeopdragte Johannes Callsen schickte sien Gröten över Video. 

 

Laudator P 2021

 

  "N beten Grütz ünner de Mütz is veel nütz, aver ´n groot Hart ünner de West, dat is best!" 

Ünner düssen kloken Snack stelle Laudator Jürgen Bethge sien Wöör för de Priesdreger Günter Herrmann, de sik bedankt för Wöör, Pries un Ehr un dat Priesgeld foorts wedder torüchgifft an de Vörsitter Truels Hansen as Anschuuv för de Produkschoon vun de twete Band mit "Niege Leder för lütte Lüüd".

 

Preisuebergabe P 2021 1

 

Mit Anstöten op de Priesdreger, rieklich Kaffe un Koken un veel Snack mang de goot veerdig Gäst ut Familie, Frünnen un Fördermitglieders klung de rundum festliche Namiddag ut.

 

 

Biller: Bernd Bednarz